林二汶本月中與黃雪文合作演出舞台劇《姊宮樂園》，二人於劇中有曖昧關係，一直被人懷疑只愛同性的二汶無懼觀眾對她的看法，她強調其取向，只會留待有敢追求她的人才會表白。

林二汶今次與黃雪文合演的舞台劇《姊宮樂園》昨晚已於灣仔藝術中心上演第一場，內容講述兩位好朋友之間的曖昧關係，以及對男性的睇法，問到二汶有何賣點？她說：「如果你曾經懷疑過自己係同性戀，甚至家仲懷疑緊嘅，就唔好諗咁多，入場睇啦。」

入行多年冇緋聞

記得二汶入行多年緋聞欠奉，反而多次被影到與女性朋友行街，之後就傳出她是同性戀。今次演與同性戀有關的舞台劇，二汶可擔心？她笑着說：「今次個劇唔係純粹講同性戀，相信好多人都會同一個女性朋友好close，之後就會懷疑自己係唔係呢。我真係唔怕啲人繼續誤會我，亦唔會去解釋，我只會留番同夠膽追我嘅人講。」

投資最緊要開心

至於黃雪文找上二汶的原因是林一峰的緣故，她本身與二汶兄長一峰份屬好友，她說：「今次個劇係講女仔，咁二汶家又獨立發展，咪問吓佢有冇興趣囉。佢除咗演唱仲做埋音樂總監，最重要佢係投資者之一。」
二汶表示已將上次個人音樂會的收入全數投資在舞台劇，她沒有想過蝕錢的問題，她說：「今次都放咗6位數，我唔理得咁多，最緊要做得開心，同埋賺咗個經驗係最重要。」
採訪：李珮洳
攝影：陳慧安
服裝：DaydreamNation