近期多隻實力工業股表現都好掂，好似建滔化工（148）咁，唔經唔覺已經衝過5元水平，噚日再升5.7%，收5.55元。經紀陳話，有證券行出報告，話睇7元。
經紀陳好似講漏咗些少。市場傳聞噚日出報告嘅證券行，稍後將會帶領一班證券界人士，到建滔國內廠房做路演，稍後唔排除會幫埋手做其配售代理，批股集資。
其實，建滔向聯想（992）收購印刷線路板業務已傳咗好一段時間，小初唔知道建滔收購呢單嘢有幾着數。不過，聽講收購間廠要成過億銀，建滔應該會印公仔紙支付收購，並可能順便批埋股集資。
小初睇見建滔近期股價走勢，相信單交易就快成事，故此抽高股價準備抽水都好正路。
除建滔之外，被同一間證券行睇好嘅創科實業（669），噚日都突然起飛，升咗11%，收3.50元。好似話係玩舊聞新炒，炒分拆咁話。