羅家英早前進行前列腺細胞檢查，接受穿刺手術，之後返內地拍網絡電影《心願清單》，點知因細菌感染發高燒，喺內地醫院留醫一星期，出院後繼續為電影埋尾。家英哥返港後又再發燒，更加高燒逾40度，之後要入住聖德肋撒醫院，留醫多日，檢查後仲發現膀胱同腎發炎。大前日下午仍未能正式出院嘅家英哥，一度包到冚同朋友外出傾嘢。

舒展筋骨

不過噚日就見到汪明荃（阿姐）喺微博貼合照報平安，見到佢同家英哥行山，似乎已康復。阿姐留言：「今天天氣很好！最適合戶外活動，舒展筋骨，家英哥好好多了，多謝大家關心！」相中見出院後嘅家英哥精神唔錯，阿姐就笑逐顏開，相信老公已經冇大礙。

04年曾患肝癌第3期嘅家英哥，14年再發現肝有兩厘米腫瘤，噚日就有周刊指阿姐初時好擔心家英哥嘅病情，同朋友提起老公患病，仲有啲眼濕濕。家英哥入院佢又忙住照顧老公，又做對方「人肉枴杖」，成晚陪住家英哥，阿姐第二日仲要為節目《娛樂大家》錄影。家英哥𠵱家可以行山，阿姐應該放心。
撰文：馮仁昭