商業電台近月上演緊一套香港播音史上最精采嘅廣播連續劇，劇情日日新鮮，呢幾日直情係高潮迭起，睇見名嘴一個又一個倒下，繼大班、毓民、大飛之後，連商台顧問梁文道同營運總裁蔡東豪都無可幸免，一個無端被屈「身心疲累需要休息」被迫封咪，另一個就同老細傾唔埋欄，俾人即時終止合作關係。
噚日商台情勢緊張，惟獨股壇名嘴「陸叔」陳永陸佢一個鬼咁風騷。陸叔朝早返工時，八方問佢對封咪事件有乜睇法，佢就好興奮咁舉手高叫「我個節目唔會停，財經永遠存在，搵錢永遠存在」當佢開完員工大會離開商台時，有記者問佢對言論自由有冇擔憂，佢就話「滙控今日有啲跌呀，呢個就要擔憂啦」。係九唔搭八，定有心射歪？

捧財經界名嘴
電台需要名嘴，就正如人類需要空氣一樣，眼見名嘴買少見少，講政治又鬼咁敏感，商台於是改變策略勁捧財經界名嘴。商台喺下午發新聞稿宣布，將會畀陸叔喺周六主持多一個全新音樂節目「第陸類接觸」。據八方打探，呢個特備節目由許冠傑現象引發，派陸叔訪問五位嘉賓，談論七十年代嘅事物，包括音樂、人生等等。五集嘉賓分別為馬時亨、許冠文、鄺其志、譚詠麟、廖秀冬等。