韓國天團BIGBANG成員T.O.P今年2月入伍，早前被爆與女練習生兼舊愛韓瑞希喺寓所吸毒，事後T.O.P同韓瑞希嘅大麻案都先後判刑，當中韓瑞希就判咗3年有期徒刑，緩刑4年執行。

而韓瑞希日前忽然玩網上直播，自爆將於明年1月出道，當中更借T.O.P來炒作。原來喺當日直播中，韓瑞希仲暗示T.O.P下體嘅尺寸，表示：「佢下面比MAC嘅唇膏仲細。」雖然佢冇指名道姓話T.O.P，但網民都估計佢所指嘅就係舊愛，而網民就留言鬧爆佢咁樣有性騷擾T.O.P之嫌。

另外，T.O.P嘅隊友G-DRAGON(GD)近日正進行海外巡演，忙到冇得抖嘅GD噚日完成荷蘭阿姆斯特丹嘅巡演，下月就會到台灣舉行兩場演唱會，而台灣嘅悠遊卡公司知道GD人氣超勁，所以今日就推出1萬張嘅限量版GD悠遊卡，不過一開售就即惹來粉絲瘋搶，令網站一度癱瘓，當中原價250元台幣(約65港元)嘅悠遊卡更被炒至5千蚊台幣(約1,300港元)，高出原價20倍。