至於7.1及六四參與群眾，是由理念出發，「精神面貌」明顯有別於蛇齋餅糭群眾，而重視理念者較多係中產、專業人士及年輕人，當正氣者聚集在一齊，會有好大感染力，傳媒人心中也有好壞之分，分得出兩類群眾性質有別。而參與者也以7.1上街作為本土香港人身份認同，在遊行中展現香港人核心價值，守秩序、守望相助，加上群眾自發而非被動員，hea住交差等放工的人唔會出現，兩者一作對比，鄭耀棠兩次挺CY更顯核突。
今次觀察上街群眾，同六四雷電交加一樣，基本上係有強烈政治信念之市民，唔係好似官員所言，當係訴求嘉年華會，如果當玩，三號風球加人潮擠塞，早就掉頭走。比起一年前，今年巿民倒梁口號更響亮，更加咬牙切齒，而且普遍印象是梁用人不當，庸官當道。換句話說，一年來佢唔單止冇止血，重建市民信任，反而仲衰咗，在經濟好景下，梁個人因素令巿民政治怨氣沖天，對爭取普選有更大決心，由此推論，特區政府已步入真正管治危機，而且內耗會因搶救CY的民粹施政而加劇。
梁粉陳茂波在各區不理規劃，「盲搶地」會觸發更多地區衝突，梁為救命會在來年狂派福利，財政司及財務科官員又與梁粉互片，立法會建制派見有辱而無榮，民建聯、工聯、鄉事唔會再「老奉」支持政府，施政寸步難行。至於傳媒，兩大報系7月2日頭版對7.1報道已說明一切，CCTVB節目部可以亂嚟，刪走RubberBand台上言論，但新聞部都唔敢太「河蟹」。至於行政會議，𠵱家是等邊一個首先跳船請辭，林煥光？胡紅玉？抑或葉劉？
老董當年落台前，整出個領匯（823）上巿被盧婆婆JR大頭佛，令中央拍板換人，今日任何小事亦會因弱雞政府而鬧大，可以錯得嘅都會錯，變成最後一根稻草！