一年一度打吡大日子，沙田馬場噚日雲集唔少名人馬主，而自由黨榮譽主席田北俊嘅愛駒、由大摩訓練及雷神莫雷拉操刀嘅「人民武士」喺第六場二班1,400米勝出，係田少今季首次贏馬，該駒單Win及組合獨贏A1分別派69及41元。

「人民武士」近兩場均喺泥地一哩出擊失手只跑位置，包括上周日由李寶利策騎屈居亞軍，與廐侶「美麗鉅星」串Q。今次換雷神轉跑田草1,400米，排6檔起步沿途守三四位，末段沿欄直上，險勝短馬頭位，影相氣走在外叠衝刺凌厲嘅「世澤之星」，從而補中打開今季勝門。
田少今場可分到約73萬獎金，但佢冇現身，皆因佢同囝囝身在美國洛杉磯，佢喺fb上載睇費達拿打網球賽嘅相同片。