上周有周刊爆料，話最近人氣怒升、見報率同葉劉淑儀有得揮嘅無綫綜藝科揸弗人余詠珊，同戲劇組揸弗人曾勵珍權鬥，會議上互不留手，有指珍姐下令，禁絕旗下監製起用來自有線嘅哥仔姐仔，好似黃翠如、陸浩明及梁嘉琪等，佢哋統統都係余詠珊愛將，搞到翠如BB忽然被放假，冇劇開。

有說余詠珊亦不留情，喺會上兜口兜面鬧啲監製「廢X」，弦外之音自行意會，但余否認。前日無綫節目巡禮上，兩位阿姐仲蹺晒手扮好姊妹任影，哦!

究竟翠如BB係咪入雪櫃呢？問佢本人咪知囉。今日佢同少爺占到佐敦出席一品牌活動，活動上翠如BB同蕭正楠嘅戀情好自然又被擺上枱、遭少爺占係咁抽水。事後翠如BB話:「冇乜所謂，大家笑下，但佢講太多，自己反應唔切。」

至於是否考慮情侶檔？佢就話等公司安排，或者等二人合演嗰套劇上映先。咁，可能有排等，上次篇報道就係話0依家要雪藏佢，所以套劇入咗雪櫃。

翠如就話：「唔係呀，聽講係不日上映，就快上。」咁你同「雪雪雪」一齊出騷，見到面驚唔驚尷尬？佢就話:「唔知呢，可能會。」

至於情侶檔價錢係咪收double？佢就好抵死咁話：「我自己騷價都ok。呢排多咗代言活動同拍廣告，想儲多啲錢置業。」