周秀娜、鄭伊健、何佩瑜等今晚喺旺角出席《iGirl夢情人》的首映，近日周秀娜被傳戀上超級富二代，今日佢再三強調否認此事，問到有指佢忽然富貴？佢話：「呢排冇乜人夠膽追，我唔擔心影響形象，生活一向都正常，自己負擔得到，亦都養得起父母。」問是否恨拍拖？周秀娜坦言：「我都恨拍拖，但係唔使估，冇呢個人存在。」

伊健表示今次並唔係首次同周秀娜合作，問到戲中嘅親熱戲？佢話：「因為佢要扮機械人，會有啲搬搬抱抱的場面，有啲身體接觸，當時我都唔覺得，不過o依家諗番又有啲似係親熱戲。」笑問有冇接觸重要部位？佢笑言：「都有啲啱位，諗番都有啲尷尬。」其間文凱玲被何浩文抱起時疑似走光，事後文凱玲話：「係打底褲，我唔知，我自己睇唔到。」