舊年呢幾日喺曼谷過潑水節，喺Silom街頭同幾萬人水戰，用水槍射嚟射去，好鬼開心。可惜今年因為當地局勢緊張唔搞潑水節，香港旅遊界又暫停曼谷團。
唔緊要，香港原來都有潑水節。今日下午5點喺九龍城會有潑水節巡遊，主辦嘅節日統籌協會主席Steve話，一群喺香港生活、經商嘅泰國人，會喺打鼓嶺道近休憩公園集合，然後巡遊經啟德道、賈炳達道、城南道、南角道，然後去九龍城廣場。
Steve話喺九龍城搞，因為呢度最多泰國店舖同人，巡經嘅街道泰國店舖，部份都會預備啲水喺門口，同巡遊隊伍進行水戰。真係聽到都心郁郁，Steve話歡迎市民加入o架。

逢周六日有嘉年華

操流利廣東話嘅ThaiRegionalAlliance副主席Parichat話，潑水節係4月13日起一連3天，係泰國新年，傳統會用清水洗滌心靈，去舊迎新，「所以嚟參加嘅市民如果俾人潑水，唔好嬲呀，係意頭嚟。」佢建議大家着輕便衣物，手機、相機就用防水袋包住。Parichat話部份鄉里話呢排都唔方便返曼谷過年，所以估計會多咗人留喺香港玩呢個潑水節。
家起至5月8日，逢星期六、日，九龍城廣場都會有嘉年華，包括展銷泰國傳統糕點、豬肉乾等，區內部份菜館仲有優惠㖭。詳情可以電27186320查詢。

電郵：mailto:[email protected]