當年今日
關於我們

隔牆有耳:
黃錦星 母親節講膠唔講心 - 李八方

蘋果日報 2013/05/13 05:20

隔牆有耳

大家母親節點過?環境局局長黃錦星,就過咗個好膠嘅母親節。呢位近來四出推銷擴大膠袋徵費嘅局長,噚日接受電台訪問,人哋問佢母親節點過,佢就話一早去咗買三個麵包畀家人食。
吓?乜咁「環保」呀?查實,局長乘機宣傳啫,因為佢話自己係帶咗個膠盒去買麵包,仲話用膠盒放麵包最好,因為唔好破壞麵包嘅外形,「菠蘿包形狀唔會扁」。
佢話超市嘅膠袋量大減九成,但麵包店派嘅膠袋就越嚟越多,所以需要收費以減少膠袋量。最後,局長都補一句,話之後會同老婆、外母、自己阿媽「三個母親」去食飯。
咁佢都算醒,如果真係淨係得麵包,佢老婆日後可能畀煮飯仔嗰啲膠造嘅餸佢食。