特區政府咁多副局長入面，曾經做過立法局議員嘅陸恭蕙，算係比較有政治實戰經驗，點知佢接受英國廣播公司（BBC）訪問，俾記者問到香港非法象牙交易問題時，竟然唔知點答，仲耍晒手疑似想擋鏡頭、又叫BBC記者熄機唔好錄，最大鑊係BBC將成條片放上網，令全世界都睇到佢失態。
話說BBC網站昨日播出一個專題，批評港府政策有包庇國際走私象牙貿易之嫌，因為香港現時有377間合法登記嘅象牙商，但一直唔肯公開名單，於是BBC記者走去問陸恭蕙點解？點知鏡頭前嘅陸副局猛話自己唔知道、唔識答，講唔夠兩句仲耍晒手疑似想擋鏡頭兼嗌停機，搞到記者先生嘴都O埋。BBC就梗係少理，將訪問過程原汁原味出街。

「再做過，可以好啲」

八方睇完條片即刻書面搵環境局回應，點知唔夠幾分鐘，陸副局親自打嚟解畫，話自己當時嘅表現確係唔好，講到明話︰「如果再做過（訪問），可以做得好啲。」然後解釋，做訪問前幾日先收到BBC嘅邀請，而且對方冇講明想訪問關於非法象牙交易嘅乜嘢問題，到做訪問時先知，仲話鏡頭後有立即幫手聯絡番漁護署，等BBC可以訪問埋漁護署。其實陸副局想避免「關公災難」？學吓Leon態度誠懇、開誠布公咪得囉！
詳情可上： http://www.bbc.com/news/video_and_audio/headlines/36166643

李八方
mailto:[email protected]