薛世恒（Daniel）人稱「Neway大少」，於08年自立門戶開投資公司，做股權投資，再於兩年後開了一間叫20 & Co.的公司，意念來自「以20年為遠景」。

20 & Co.最新項目，就是8月中完工、旺角翻新商場項目，將會主攻零售及餐飲。

地產對Daniel而言是新嘗試，他接受《蘋果》訪問時稱：「好多人買磚頭返嚟收租，之前我哋以一個投資形式去買。去到兩、三年前，我哋想轉型做一啲發展，同買磚頭投資有啲唔同，有增值、創造件事。」

【太子爺空降：如果有人想呃我，好易呃到】
科大讀計算機科學碩士，因爸爸薛濟傑圓讀書夢重返校園讀博士，他一畢業第一份工，就要打理家族生意。零工作經驗，碰壁難免，亦相當有壓力：「係老闆個仔，空降落嚟，我啱啱畢業，識得啲咩嘢？自己知自己唔識嘢，人哋又知我唔識嘢，要喺嗰個位置去做，每一樣嘢都唔知自己做得啱定錯，只可以知道啱嘅嘢就繼續去做，但係好多嘢都諗唔清楚、諗唔通。

「你請教人，每個人都有唔同答案，唔知信邊個，喺咁嘅情況之下，都幾擔心自己做錯。如果有人想呃我，好易呃到喎，各樣嘢都會好收埋，都係一個壓力。」

【「屋企人畀你做，你唔可以做得差」】
Daniel開拓事業，隨心發展有興趣的生意，更由零開始，開一間大概有四、五個員工的細公司，再按項目，與不同的專業顧問做合作夥伴：「一個project牽涉其他合作夥伴，某程度係同事，但你唔會請到佢，合作搵最叻嘅人，會以顧問形式合作。同我合作都係香港數一數二嘅合作夥伴。」

相比以前要管理一間二千人的大公司，或跟屋企打工，直言壓力相對少很多：「自己做到衰晒、錯晒、執晒笠都係我自己，以前嘅心理壓力，又驚做錯，屋企人畀你做，你唔可以做得差。」

家人是不可分割，但一起工作磨擦亦少不免，Daniel承認：「我阿爸真係生意人，開口埋口都係生意，你幫唔幫佢打工都係講呢啲嘢，如果你喺所謂一個family business式管理公司，你無可避免將家人關係同工作關係混得好緊要，呢啲嘢係有衝突，每個家族生意都無可避免情況，有多啲嘢顧及，0依家就簡單。」

【大仔係難做少少，細仔都唔易做】
爸爸是成功生意人，在Daniel眼中他永不言退，問到父親會提點，但當然亦有自己看法：「我出世嗰年佢已經做緊生意，梗係食鹽多過我食米。佢好有危機感，認為『生於憂患，死於逸樂』，所以佢做嘢諗好多嘢，好多好可能發生嘅情況，可能喺佢眼中，覺得我好冇危機感，冇佢咁勤力都未定，我撞板多過食飯，有啲嘢總係要撞出嚟。我個bar都好高，但我覺得憂慮唔會幫你做到啲咩。」

對於工作上遇過挫折，Daniel笑言：「我都好順利，我都冇試過全盤失敗，好驚險就試過，例如乜乜風暴、海嘯，越耐越發現識嘅嘢係越少，因為知道自己白癡嘢越嚟越多，我都guarantee將來一定會總有。」

作為家中長子，Daniel直言屋企會對他有期望：「大仔會多啲期望，屋企人畀你多啲期望，大仔係難做少少，細仔都唔易做。」

如何看承繼家族生意，他說：「我希望我做嘅嘢，有一日可能有人繼承，屋企人有需要，我一定盡我所能。我阿爸不言休，佢做緊好多家族生意，我細佬都做緊好多家族生意，我阿爸都咁講，我哋三個人、三父子一齊比賽，睇吓邊個發展得好啲，十年之後。」