曼聯上星期六晚作客以1:0小勝修咸頓，但球隊隊巴離開聖瑪莉球場嘅時候，為球隊入波嘅盧卡古就唔喺車上面，原來呢位比利時前鋒被抽中要做賽後藥檢，點知要提供尿液樣本嘅佢發現原來小便仲難過入波，結果就趕唔到搭隊巴要自己搭的士！

今夏由愛華頓轉會曼聯嘅盧卡古狀態大勇，24歲嘅佢各項賽事總共入咗八球，喺六場英超為紅魔入咗六球，平均每場射入一球，只係主場贏李斯特2:0嘅一場冇士哥。