同樣來自單親家庭的東逸，今年17歲，身材健碩高大，是音樂兒童基金會首屆學生，論年資與外型，都是基金會的大哥哥。大提琴沉穩、安詳的琴聲，將5年前性格火爆的東逸，慢慢如調音般調好了，眼前的他性格內斂，鏡頭前後都顯得腼腆；反而拉奏大提琴時，眼神閃過一絲自信與光芒，明年將考DSE的他，已為將來人生訂下目標：「做個音樂家，希望有多啲演出機會，可以靠音樂搵食，同埋做自己鍾意做嘅嘢。」

記者：金敏琍、謝頌昕　攝影：麥超億、温瑞麟

生於基層家庭的東逸直言，之前想也沒想過有機會學習音樂，「覺得比較奢侈，以前小學都有啲同學去學，佢每堂都要交200幾蚊，佔生活開支好大部份」。

接觸音樂之前，東逸常在球場流連，或沉迷網絡遊戲，性格火爆急躁，有如一名憤青。原來他於4、5歲時家庭遭逢巨變，父母分開成為單親童，自此沒再與父親接觸。童年期沒了父親，不滿情緒埋在心底：「一直冇見過爸爸，都會覺得遺憾，因為始終見到人咃同學有老豆，自己就冇。」

母親獨力帶大東逸與弟弟，生活捉襟見肘，他自言還未看到起跑線已經早早認輸：「都算係，其他人細個開始學好多興趣班，而我就少，都係學校星期六、日嘅課外活動。」媽媽看在眼裏暗自擔心，至2014年發現音樂兒童基金會提供免費音樂興趣班，便建議東逸報名，「嚟到就發現有免費嘅機會，學完4年之後仲可以有獎學金繼續學，都開心嘅」。

東逸說，目標是要考取八級樂理資格，但自知起步遲，故希望透過努力學習追回進度，為日後從事大提琴老師做好準備：「若果中心叫到，我會返去教小朋友，因為知道學音樂唔平，所以希望幫到佢哋，唔好浪費機會。」

看見他一臉認真堅定，其實5年前他初學時只是玩票性質，一來抱着「唔使錢可以試下心態」，又可以應酬母親，在興趣班上選擇了大提琴，也是基於一場誤會：「以為揀中一件可以坐喺度彈的樂器，誰知後來發現所有樂器都係坐喺度。」

習琴初期，他自言一點也不投入，甚至想過放棄：「最初好難，完全唔知件樂器點用，同埋望到阿sir拉得咁好聽，而我就好似「劏雞」咁就覺得有少少氣餒，唔係好想繼續學落去……有一段時間都成日唔練琴，俾阿sir鬧咗好耐，之後我開始入樂團，望到份譜，真係好似未見過啲嘢咁，變咗另一個世界，唔同上堂，覺得自己係時候改變，練多咗琴、放學就唔會周圍去玩。」朋友找他去玩他亦婉拒，理由是要回家練琴，他指當時這樣回答就被朋友取笑：「佢哋話玩一陣再返去練啦，但之後我都係作第二個理由，話返屋企做功課，或者返屋企有嘢做，就快啲返屋企，唔出去玩。」

發心練琴，是因為見到自己不足，不希望出醜於人前，「去咗樂團之後發覺跟唔到啲進度，想拉好啲吖嘛，唔想出醜拉唔到，會俾指揮講，所以就努力啲練，而家都ok」。現時除了每周上堂外，逢周六晚上，基金會內不同樂團成員都會一起彈奏，為每年在暑假舉行的音樂劇作準備。

由最初一竅不通到越拉越起勁，從發出劏雞般聲響到有板有眼，東逸自言愛上了音樂，音樂亦改變了他。不過他發現自己的弱點是欠缺感情，希望未來能夠改善。昔日他很少跟母親與弟弟溝通，更因頑皮令母親十分勞氣，但自從學習大提琴後性格有所改變，令一家人感情大有改善：「因為以前自己成日做錯嘢，令媽咪好勞氣，而家明白多咗、體會多啲，越嚟越知一個人帶兩個細路嘅辛苦，大個之後都會孝順媽媽。」東逸現時亦樂於與母親及弟弟，分享自己在學校的經歷。

音樂改變兒童、兒童創造音樂，音樂協助東逸改善與家人的關係，他的自信心亦隨着跳動音符一點點建立過來，「有時啦，上台表演嗰陣會（覺得自己是主角）囉，會覺得有人望住自己，就會想拉好啲，唔想出錯。」對於將來，東逸未敢有宏大理想，只希望養活自己、不用家人擔心、平穩地過生活，以及繼續學習大提琴，為自己生命添上悠揚樂韻。

--------------------------
你撐蘋果 我捐$1
支援反送中抗爭者
--------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568