特首林鄭月娥呢排心情點？畀人出氣喎，心情當然都唔會好得去邊；如果喺呢個時候仲上火藥庫，好易一點即爆，而東周刊今午舉行嘅15週年慶典及經典品牌頒獎典禮，林鄭與人稱炒何嘅星島集團主席何柱國相遇時，就擦出唔少火花。

早前《星島日報》一篇專欄文章，鬧港府縱容港獨，尤其不點名批評「政壇毒蚊」周圍放料，尤其畀咗某報章專欄「余腦炎」，講到打港獨只係建制派搞局，唔代表中央，講緊邊個？政界中人心中有數。勢估唔到，炒何致辭時竟然重提此事，仲解釋埋點解叫「余腦炎」。炒何先讚政府風災處理算係安排得幾好後，突然轉話題，指早前某報章專欄作者「余錦賢」話《星島》寫有關港獨嘅嘢，其實只係建制派意思，並不反映中央意見，直斥對方可能畀毒蚊針到，白痴兼無腦，因此可以叫「余腦炎」，重申港獨問題不能縱容，《星島》嘅政治路線從來正確。

嘩，據聞聽到炒何咁講，在場嘉賓在「叮」一聲，等住睇大戲，隨後致辭嘅林鄭，果然冇令大家失望，佢一開始就透露活動舉行前，東周刊話要改rundown，想俾佢講先，「好彩我呢個特首辦主任醒目，我呢個同事係最叻，佢話千祈唔好制，你一定要比何生講先，然後我要回應，特首講嘅先算數。」唔知當時在席嘅陳國基，有冇冷汗係咁標？但林鄭繼續「勇武」，據知佢強調自己既對香港、也對中央負責，總之特區政府並唔係好似「某報」所講，縱容港獨囉！冇理由佢唔記得，呢個係《星島》集團舉辦嘅活動啩？

曾經批評過土地專責小組嘅炒何，同場亦有再批話班人係「廢柴」，指小組曾約佢食飯，諷刺呢班人額頭鑿住「高球場」幾個字，認為要覓地就係要填海、就要同發展商合作、就係要搵棕地。林鄭對此都有還拖，佢話土地小組絕對唔廢，相反做咗好多嘢囉。

重點係，好戲在後頭。林鄭致辭至最後，提及今日係東周刊經典品牌頒獎禮，佢認為品牌要有三個特質：credibility、reliability同與時並進，至於東周刊長遠能否做到，大家「拭目以待」。竟然係「拭目以待」...有在場嘉賓話，單睇兩人發言，已經值回票價。

而林鄭完咗儀式就走人，據知係一早同大會講定，呢個係劇情所需；至於令人驚嘆嘅致辭內容嘞喎，據聞就係純個人發揮嘞。

立會補選新聞，《蘋果》一網睇晒
http://bit.ly/appledaily1125