前財爺曾俊華因為喺港台擔任「香港故事──修復時刻」節目主持，早前惹來特首辦轟佢無申報，估唔到節目內容同樣燒到娥特！話說有受訪者喺節目中批評，政府抹煞民間對保育嘅貢獻，將保育當成自己功勞，矛頭直指曾任發展局局長嘅現任特首林鄭月娥。娥特噚日出席行會前先暗示冇捧薯片叔場，繼而為自己平反，自稱唔鍾意邀功，但出任發展局局長嘅歷史保育成就「有目共睹」！
薯片叔主持嘅節目中訪問咗中西區關注組羅雅寧，羅批評政府經常用各種方法貶低一個地方嘅歷史價值，又抹煞民間嘅努力，將保育當成自己功勞，例如民間團體努力爭取保留中環已婚警察宿舍（即係PMQ元創方）同埋舊中區政府合署西座，都係幾經爭取先成功，節目其後就播出林鄭競選時將活化PMQ、舊中區政府合署西座嘅片段，將之形容為自己嘅功績。

冇聽薯片叔節目　唔知被狂插

林鄭噚日被問及此事時強調「我冇睇、冇聽節目好耐」，暗示冇捧薯片叔場，繼而強調自己喺保育方面成就「有目共睹」，以最近獲頒聯合國保育卓越獎項嘅灣仔藍屋群為例，話自己多年來喺藍屋嘅保育工作得到非政府機構認同，而獲獎後佢都收到聖雅各福群會嘅感謝信。
但林鄭都補充，有關工作唔係一個政府或一個局長就可以完成，都要依靠好多非政府機構嘅協作，強調從來唔係喜歡「個人邀功」嘅官員，「甚至乎如果唔係做行政長官，我都唔會同大家（喺網上）分享日常生活點滴」！噢，真係難為了娥娥！

李八方