蕭正楠噚晚喺大台頒獎禮上獲獎，突然自爆同黃翠如已經成婚（新聞連結： https://bit.ly/2LkiRTI ），原來兩人今年4月喺新西蘭正式註冊成為夫婦，今日蕭正楠同張達倫喺上環開工拍劇，蕭正楠話：「收到好多人恭喜，但未有時間回覆，好多謝每一位祝福我哋朋友，有啲好友同親戚都未必知道，我覺得用呢個方法話畀大家聽係最開心，請大家原諒我之前冇講出嚟。」

婚事收得好密，係咪唔攞獎就唔打算公開？蕭正楠話：「冇獎攞就再諗吓，但都希望今年裏面講，噚晚係一個好好嘅時刻，見到好多女藝人同朋友都喊晒，原來我咁受歡迎自己都唔知。胡定欣攬住我喊話好感動，但我想攬住我嗰個係翠如，可惜佢已飛車走咗，因為佢唔想成為焦點，我講完之後，佢只係嘩一聲就走咗。」

蕭正楠好友曹永廉早知道兩人婚事，一直保守秘密，蕭正楠講笑話：「我媽媽知道，阿廉都知，佢同我阿爸身份一樣，好多謝呢位朋友咁支持我，為咗呢件事幫我諗好多辦法，搞到佢頭髮都白埋，最終我自己諗係有咩好得過喺全香港朋友面前同大家分享呢一件事，好希望畀到難忘嘅一晚畀太太，所以冇理到人哋話騎劫，我只係覺得開心share。」

蕭正楠話噚晚返到屋企，見到太太黃翠如就喺門口用好迷人嘅眼神望住自己，「嘩，從未見過佢咁溫柔，知道我自己面對傳媒去處理件事，佢好感動，但瞓醒就打回原形。」

精選娛聞，喺晒《娛果》
http://fb.com/appledailyent