由Netflix原創嘅喜劇《小鎮滋味》（Santa Clarita Diet)第二季即將上架，兩位主角杜莉芭里摩亞（Drew Barrymore）及添姆菲奧芬（Timothy Olyphant）專程去到泰國曼谷宣傳劇集，二人繼參與紅地毯之後，昨日下晝又出席記者會，一向直言嘅杜莉仲自爆呢套劇幫佢走出人生低谷，指嘅應該係2016年與第三任丈夫Will Kopelman嘅離婚經歷。

首先二人於記者會上大讚劇集有意思，唔單止關於食人，更加係關於家庭，充滿住愛。劇中杜莉係個喪屍，成日都要食劇組預備嘅「人體殘肢」，佢大吐苦水表示：「有乾咗嘅蘋果，有飯，有紅色嘅蛋糕，但全部都係噁心嘅味道！只可以話每日食嘅嘢都有驚喜！」佢仲話自己一向為食，只好想像自己食緊pizza先食得開心啲。另外今次亦係杜莉第一次拍劇，佢話自己本身好擔心，每個禮拜收劇本嘅時候都驚唔識演，但最後每次收到都好滿意，呢個時候添姆菲就講笑話：「你係杜莉芭里摩亞！唔鍾意咪叫人改劇本囉！」引起全場大笑。

之後杜莉更開腔講到自己接拍時嘅經歷：「我嗰時正值生命中嘅艱難時刻，乜嘢都唔想做，有個劇本？我唔想睇，唔想演。但有時睇上去好差嘅決定，會變成你最好嘅決定，將你從低潮中拉返出嚟，令你嘅生命變得美好。」相信佢係指2016年與第三任丈夫Will Kopelman離婚，結果靠拍劇先重拾精力同自信：「就好似人生中最大嘅一場賭博，而我賭贏咗！」

添姆菲亦有講到自己寫咗個電郵，極力遊說杜莉演出：「不過佢成兩個禮拜之後先覆我！」杜莉就笑指自己要諗清楚點覆先優雅又有禮貌，添姆菲就回應：「如果你最後唔演，我一定追住你唔放。」二人又講到自己嘅仔女都有嚟現場探班，不過杜莉兩個女太細，得5歲同3歲，所以面對劇中血淋淋嘅場面，杜莉只可以話：「係畫畫！媽媽每日都拍畫畫戲，不過全部都係用紅色畫嘅。」要等囡囡大個啲先可以講出真相。最後杜莉就話自己好掛住兩個女，急不及待想返屋企見佢哋，至於添姆菲就話自己唔掛住3個仔女，只係想去海灘訓兩日，之後就應該會開始掛住喇。

精選娛聞，喺晒《娛果》
http://fb.com/appledailyent