一年一度嘅城中盛事書展噚日開鑼，特首曾蔭權（圖）亦親臨做主禮嘉賓，同時仲主持埋灣仔會展中庭擴建工程落成典禮。特首今次亦趁此機會，大讚會議展覽業為香港帶嚟唔少經濟效益，同時亦乘勢宣佈，將就會展第三期擴建計劃作公眾諮詢；不過佢加多句，話會展擴建有強烈理據（strongcase），而第三期擴建仍然係佢嘅「夢想」。咁係唔係暗示唔使諮詢呢？

特首：呢個係我嘅夢想

灣仔會展嘅競爭對手、機場亞洲國際博覽館即刻有意見，話其實亞洲博覽館現時仲有相當展覽場地空間，可配合增加各類型展覽會議活動，只要透過不同展館協調，其實可以提升公共資源效益。
根據會展第三期擴建計劃，主要係喺灣仔運動場嗰度改建。特首噚日話，以目前情況睇，仲需要遷移部份政府大樓同公共設施，以騰出空間進行擴建。佢話政府會就此向公眾進行廣泛諮詢，平衡各方利益。
貿發局主席蘇澤光仲明確，話香港需要更多市區展覽設施以保持競爭力，而會展中庭擴建後已迅速爆滿，多項貿易展覽仍然有好長輪候參展名單。呢單嘢仲未埋牙，睇來日後各方會出盡力做游說嘞。