戀愛並沒有預告，36歲嘅袁偉豪，與25歲嘅港姐張寶兒因到非洲拍攝《打工捱世界II》，機緣巧合下，促成呢段戀事。去年袁偉豪先同拍拖三年，同是港姐出身嘅岑杏賢分手，沒想到今年五月就閃電搭上張寶兒( 新聞連結： http://bit.ly/2fW8PN3 )，袁偉豪接受周刊專訪時，坦承以短訊向女方試探後，曾經有一刻想過縮沙，同寶兒做回朋友、同事，但幾經爭札同細心思考後，佢都係想同寶兒發展，成為真正愛侶。

年齡相差11年嘅袁偉豪同張寶兒，今年5月到坦桑尼亞拍攝《打II》，呢次合作就好比一條紅線，將佢哋綁住。袁偉豪接受周刊專訪時，回想起同寶兒嘅發展經過。佢話，當時喺非洲，地方比較荒蕪，心境好平靜，同寶兒傾偈時亦比較感性。袁偉豪好坦白咁話，自己喺工作以外，好少主動同人傾偈，而寶兒就主動同佢傾偈，期間發覺佢好欣賞自己嘅生活方式，令到袁偉豪有一種被賞識嘅感覺。

相信好多人也愛被人賞識，當袁偉豪感覺被寶兒賞識，佢認為好難去避，最後選擇咗順其自然。報道中講到，袁偉豪話自己同岑杏賢分手之後，經過半年多嘅療傷期，本來都唔想咁快諗感情事，但緣份要來，是沒法可擋的。

「緣是天意，份是人為」，袁偉豪話，從來沒有刻意留意過張寶兒，只係當時《打II》需要一個助手到非洲，而寶兒參選港姐時，曾自誇好捱得，所以就揀咗佢做助手。緣就由節目促成，份當然是人為啦，袁偉豪就用短訊來試探寶兒。

報道指，袁偉豪話記得有一日，佢哋坐喺架車上面，雖然坐得好近，但仍以信息傾偈。

袁：呢一代嘅女仔，會幾時結婚生仔？
張：冇咩所謂，鍾意一個人，可以唔結婚。

袁偉豪睇到寶兒嘅答案，即刻對佢有另一種看法，跟住佢再問：

袁：如果要你做我背後的女人，你會點做？
張：不知如何去做你背後的女人。

呢個答案，就俾袁偉豪知道，寶兒亦對佢有意思，佢覺得同寶兒嘅關係已行出第一步，算係開咗好多道門。

正當愛神之箭射出不久，男方卻猶豫了，當佢哋由非洲返港後，袁偉豪就想縮沙，想同寶兒做番朋友。報道指，袁偉豪由非洲返香港後，原本打算唔再聯絡寶兒，覺得同寶兒都係冇可能發展，當時佢就同寶兒講，不如做番同事，唔好再諗拍拖嘅事。

自斷情根嘅袁偉豪，唔夠廿四小時，佢就後悔喇，忍唔住打電話俾寶兒，話要收番之前嘅說話，覺得自己太衝動，原本想待舊愛岑杏賢搵到另一半，自己先再考慮感情事，佢覺得同岑杏賢拍拖三年，感覺就好似家人，分手後一直都未能夠放下，但諗真啲又唔想因為自己嘅顧慮而抹殺咗眼前呢個機會。佢話，幸好寶兒能夠體諒佢處境，當時都好尊重佢嘅決定，話不如做朋友先，一直都用好正面嘅態度去支持佢嘅決定，無形中令佢好想保護呢個女人。