【李八方online】何啟明突襲問「情史」 陳帆「嚇」到目瞪口呆
麥美娟港鐵強積金對沖領展何啟明
工聯會何啟明無厘頭問運房局局長陳帆「情史」,將領展比喻係「前女友」,同港府嘅關係糾纏不清。李潤芳攝
工聯會麥美娟向娥特追數,要求政府解決民生「三座大山」。李潤芳攝
提出修正案嘅公民黨郭家麒就引述聖經話「三座大山」折磨港人。
李潤芳攝
政務司司長張建宗講明政府無法律權利干預領展日常運作同商業決定,但不時都促請領展多留意議員同巿民意見。
特首林鄭月娥競選特首時,點出香港政府喺民生問題嘅「三座大山」,包括領展、港鐵票價同強積金對冲,工聯會麥美娟今日向娥特「追數」,喺立法會動議要求政府盡快制訂措施解決上述問題。早前孖住新民黨葉劉淑儀提出私人草案要求規管領展加租嘅麥美娟,席間炮轟領展為咗加強謀取利潤,不斷向商戶加租,結果巿民生活所需不斷加價,小店全部消失,狠批領展令香港人「肯捱、肯搏、肯向上游」等香港精神無咗。佢嘅黨友何啟明發言就時學前議員王國興咁展示大鉸剪道具,寸領展應該改名「領剪」,「係剪斷晒成個社區人情味、社區關係網嘅『領剪』。」
但何啟明其後無厘頭追問在席嘅政務司司長張建宗、勞工及福利局局長羅致光同運輸及房屋局局長陳帆情史,問三人有冇前女友?佢自己冇,因為初戀情人係老婆,原來佢想形容領展就如政府嘅前女友,糾纏不清關係下,「我哋要完全對付佢、甩晒,又無可能」,跟住叫陳帆諗下:「如果前女友經常喺你老婆面前掩掩抰抰,仲要你成日同佢傾偈合作,你老婆都會好㷫啦,係咪先?」立法會鏡頭所見,陳帆聽到目瞪口呆,繼而低頭「思考(定忍笑?)」。
提出修正案要求政府回購領展已拆售公屋商場、街巿同停車場嘅公民黨郭家麒就引述聖經《彌迦書》內容,話現時政府搞嘅「三座大山」削緊巿民嘅肉、煎巿民嘅皮,質疑:「天堂會留位畀呢啲咁嘅狗官?」指領匯上巿係前特首老董嘅「德政」,當年建制政黨全部支持。
區諾軒都提修正案要求政府局部回購領展物業或覓地作臨時街巿,指政府可用200億公帑購買社福單位之時,要等幾多個社區淪陷先會回購領展物業?張建宗回應時話,領展若無違反同房委會簽署嘅契諾,政府無法律權利干預領展日常運作同商業決定,重申政府不時「鼓勵同促請」領展多留意議員同巿民意見。
-----------------------------
免費訂閱《蘋果動新聞》, 無懼霸權橫行!立即登記!
https://hk.adai.ly/bXz2v29BrV
-----------------------------
4月4日 10am-11pm 即玩《MINI GAME大挑戰》
隨時贏SuperPark門票2張
https://bit.ly/2WigzsG