一如近年Nike的慣例，球星的簽名球鞋新色不斷出，好像Kobe 11推出至今就已經出過數唔清咁多款配色，而除了記者超喜歡的「White house」、炒至天價的「Mamba day」和「FTB」等等超注目配色外，講到平民一點，又可用正常價買得到的靚色，相信就要數由Nike總裁兼首席執行官Mark Parker、Eric Avar以及Tinker Hatfield親自設計的Muse Pack了。而Muse Pack的最終回就是由Mark Parker設計的Parker Muse，新鞋以Kobe的霸氣外號「The Black Mamba」為靈感，以黑色主導，深藍及白色點綴，並在鞋面上加入不少模仿黑曼巴蛇的細節。例如從重新設計模仿蛇紋的Flyknit紋理，加入紋理細節的鞋帶和鞋舌，以及模仿蛇的腹部而加上橫條紋的鞋底，設計細節相當富心思。

但相對來說，記者更愛上一對由Tinker Hatfield設計的Tinker Muse，把Kobe最愛的經典AIR JORDAN III配色和特點，融入至最新科技的Kobe 11之上，最大亮點更是右腳後踭位的大大個經典Nike標誌，復古味十足。雖然已推出了幾星期，但記者早兩日見仲有得買，絕對值得入手，總好過買炒價款，俾錢水貨鋪賺。不過記者自己其實仲有一個考慮，就是上兩代Kobe 9和Kobe 10都有出超高筒版，偏偏Kobe 11就等極都未有，甚至連消息都沒有傳出過，對於鍾情高筒籃球鞋的記者實在可惜，希望會出喇！

記者：韓繼聰