蘇姍（右）同彭家麗噚日喺新城為一個唱歌比賽擔任評判，蘇姍透露呢個比賽已經進行咗六個星期，如果有參賽者成為連續三次台主，將會殺入台主戰，勝出者將獲一份經理人合約。彭家麗嘅評審準則會着重參賽者當時嘅表現，所以當蘇姍話曾經有位參賽者事前冇背熟歌詞，最後要拎住「貓紙」表演，彭家麗即刻話：「嚟比賽要做足準備工夫會好啲。」
撰文：馮仁昭