泳兒、鄧穎芝、吳志雄同女子組合B.Gs今日到亞博參與一個大陸紙巾品牌周年活動，適逢今日5.20，如以普通話讀音是「我愛你」嘅意思，不少情侶都會借呢日互表愛意，問到泳兒有冇向男友有所表示？佢話：「哎呀，我都唔記得，等見到面先講。」泳兒自爆並非第一次忘記表示，原來去年聖誕節佢都遲咗送上禮物，令男友有微言：「我本來想剪條片畀佢，點知原來要好多時間，我剪唔切，其實我將平時影底佢醜態片段，剪得有趣味啲送畀佢，想話無論我男朋友點都喺佢身邊。」泳兒指男友喺電話收到條片後都好驚喜。最近泳兒跟男友喺屋企助養咗3隻貓B，令原本屋企兩隻狗中，其中一隻出現呷醋情況，而兩人首次養貓，所以要從新學習。

甚少喺香港演出嘅鄧穎芝透露今年會灌錄新歌，早前接拍咗電影及網劇，更初演人母，佢話：「我都好唔慣，好彩哥哥同妹妹都有小朋友，當同佢哋相處。」佢又指原來男友要求咗，禁止佢拍激情戲，可能親熱戲最多只限拖手仔，問到遇到好角色會否先斬後奏？鄧穎芝話：「會傾吓，如果男友阻礙工作，咁唔得囉。」

另外，好姊妹張紋嘉搬屋想租倉存放物品，怎料傾談下變成佢哋兩人跟另一位好友共同租工厦單位作工作室，鄧穎芝話：「可能每人幾千蚊就租到一千呎，用嚟教運動班或者拍嘢都得，想搵觀塘區。」

精選娛聞，喺晒《娛果》
http://fb.com/appledailyent