向來語出驚人嘅金融界立法會議員吳亮星，送上新年第一炮，無啦啦喺未經查證下，喺立法會議事廳發表抹黑失蹤書商李波「宿娼嫖妓」謬論，雖然道歉收場，卻未減網民怒火。一向鍾意惡搞歌詞評論時事嘅音樂人JFung，不惜捱眼瞓通頂趕工，整作咗一首名叫《那星出征》嘅新作寸爆吳亮星。

JFung話，估唔到2016年過咗未夠一個禮拜，吳亮星就迫佢出手，今次最不滿係李波被失蹤，仲要俾人砌生豬肉話佢偷渡北上叫雞，吳亮星求其讀一篇嘢咋，就話係消息來源，真係要講句「DLLM那星」咁話。

吳亮星嘅謬論，又點只呢一次呢？JFung特別喺片中，將呢啲「星球語」重新剪接成一首新歌，片中被惡搞嘅「吳X星」話：「我啲老朋友相信都係嫖妓的熟途老馬，洗頭艇都知，係用自己的方法返內地洗頭，五條商界友的老婆當場逮捕」。JFung仲作埋打油詩贈㷫：「唔飲唔知鉛水好，唔嫖唔識光頭佬；出征要靠洗頭艇，那星熟路出晒名」，相當抵死兼貼題。

除咗JFung，連有線新聞台都忍唔住抽水，宣佈1月7日重播以偷食為主題嘅《飛虎出征》，認真「應景」，仲特別提及片中四人會用「自己方式」過大海尋歡，「如有雷同、實屬巧合」喎。

《那星出征－JFungRemix》： https://www.youtube.com/watch?v=6PcnrOs6Ewk