剛才講到吳日言(Yan)噚日喺IG打到:「他就像得道高僧，我從來只是屋村(邨)平民，跟（根）本就不適合出現在他的作品上。可能，我多心了，所以我需要流汗來冷靜。」點睇都似係講緊昔日拍檔麥浚龍（Juno），不過本報打俾Yan，佢就支吾以對，似有講唔出嘅委屈。

我哋繼續問Yan，講到上個月好多網民公開召喚佢，問佢會唔會參與Juno繼《羅生門》之後嘅四部曲？五部曲？六部曲？Yan就尷尷尬尬咁話：「無份參與呀！所以唔講咁多喇！講多錯多，得罪人就唔好啦！其實從來都係人哋嘅四部曲，我冇份參與，但都好多謝我啲朋友喺我唔開心嘅時候撐我，仲有你哋都第一時間問我發生乜事，咁都好多謝嘅！」

究竟發生乜嘢事？《蘋果》透過知情人士，大概知道來龍去脈，知情人士就話：「因為好多網民都好期待Yan出現喺Juno呢幾步曲嘅歌度，所以接住《羅生門》推出，佢同周國賢合作嘅外傳《雷克雅未克》，打算揾Yan現身，安排佢喺MV最尾嗰度現一現身，本來Yan有份參與都好開心嘅，但係負責聯絡佢嗰個人就講咗啲嘢令佢好唔開心，最後Yan就決定推咗唔拍。」

知情者仲爆料話：「Yan為咗呢件事喊爆，因為揾佢嗰個人同佢都識咗好耐，但係對方『邀請』佢拍MV嘅態度，佢就完全接受唔到，好似Yan問對方個MV會點拍？但嗰個人就用畀你拍都益咗你啦嗰種態度答佢『咁你想知乜吖！』問佢係咪一定要嗰日拍？換嚟嘅答案就係『你嗰日嚟就拍，唔嚟就冇！』」就係咁激到Yan死死吓，覺得自尊心受創！」

記者再whatsapp問Yan，得道高僧係咪即係Juno？佢就用返whatsapp回覆話：「可能有好多嘢我諗多咗......算啦！我知自己唔夠紅，知名度又唔高，不過，就算係臨時演員都係演員，應該受到尊重。雖然我乜都無，但我都可以選擇自已條路！」雖然Yan喺字裡行間加咗個笑臉公仔，但睇到佢呢個答案，似乎佢唔多似笑得出囉！聽聞Yan為呢件事經爆喊，但Yan就堅持話冇喊過，仲搞晒gag咁話：「無流淚，流汗啫！」