又賣晒啦！周國賢（Endy）嚟緊12月喺麥花臣場館舉行《銀河鉄道之夜》演唱會，日前公開發售兩場門票，唔使1粒鐘被掃清光，今日開賣加場門票，點知仲誇，短短10幾分鐘就秒殺，大批喺通利琴行排到死但買唔到飛嘅fans，直闖Endy嘅facebook留言呻爆：「14分鐘俾職員宣告死刑...」

今早9點幾，門票公開發售前半粒鐘，Endy喺fb寫道：「12月14日的加場門票陣間10點鐘就開賣啦，我都唔執輸，自己都買返幾張先。」結果開賣唔使幾分鐘，fans紛紛湧入留言：「10:01 通利售票處話$680坐位已經冇晒，10:03 通利話坐位已full，職員話排第2嘅人都可能已經買唔到。」、「周生你搶乜鬼~我只係想同我朋友買兩張飛嚟捧下你場~都搶唔到~無得睇我o依家覺得好失落！」、「我喺九龍灣megabox通利排第三都買唔到。」

Endy演唱會飛一票難求，網上出現炒飛潮，原價$680炒到$1,500，fans留言鬧爆黃牛黨，又質問主辦究竟攞幾多張飛公開發售？《蘋果》向主辦WOW Music了解，發言人鄺小姐表示：「其實之前喺公司fb接受fans預購兩場門票，因為要留名同限買10張，希望可以控制炒飛情況，今次加場就冇再搞實名認證。」鄺小姐指全場約1500多觀眾，約七成飛作公開發售，$680坐位僅得3行，多謝大家對Endy嘅支持，公司每月都入紙幫佢申請開紅館騷，希望紅館快啲畀期。