鄭嘉穎與導演陳果昨日早上9時許在澳門拍攝新片《九龍不敗》期間，因未向當地保安部隊事務局申請、在當天在大樓外拍攝，且在當局人員阻止下，仍強行闖入大樓進行拍攝，故鄭嘉穎及導演陳果等人遭帶署調查(新聞連結： http://bit.ly/2jJ0DQQ )，至昨晚10時許一行人獲准離開警局，鄭與陳即拍片解釋事件(新聞連結: http://bit.ly/2j7aTPz )。而今日老闆黃百鳴出席hmv數碼中國集團盛大週年晚宴，都有講到呢一件事。

黃百鳴指佢哋都返緊嚟，連導演陳果都返緊嚟，黃百鳴就話其實場地係申請咗，不過就申請咗門口，冇申請入面，佢話：「你知道8、90年代嗰啲導演，為咗效果，都會偷偷地拍，佢可能覺得都去到門口，為咗效果就偷雞，走咗去入面，事實都係佢唔啱，佢都要負責返。」至於拍咗嘅鏡頭用唔用到就未知。又話其實唔關鄭嘉穎事，因為演員係好被動，仲講笑話：「所以應該由陳果負責道歉。」

黃百鳴又話想當年佢自己都係咁，去到埃及拍嘢，都爬咗上金字塔。嚟緊《九龍不敗》團隊都仲要返到澳門拍，不過已經申請晒，所以唔會有問題，又話陳果喺澳門協助調查嘅時候，有冷氣又有咖哩飯食。