前財爺「薯片叔叔」曾俊華選完特首之後，無官一身輕，閒雲野鶴指點江山都不知幾寫意。早排佢應DJ黃志淙邀請，幫ViuTV嘅音樂節目做頭兩集嘅嘉賓。

唔講唔知薯片叔叔唔止係武術高手，原來後生個陣佢仲係Rock友一名，60年代喺美國讀書時，同當時仲係女朋友嘅太太黃蓮華更加係追星一族，有次仲因禍得福享受特別待遇，佢話:「我哋後生嘅時候都係嬉皮士，有一次去聽美國鄉村民謠歌手Joan Baez嘅演唱會，點知去到門口話啲飛賣晒。」當時薯片叔叔同太太堅持唔肯走，後嚟Joan Baez見到佢哋，就好奇點解多人企係門口，薯片叔叔話:「我哋話買唔到飛，佢即刻邀請所有喺門口等嘅人，坐喺舞台睇，嗰遭遇都幾特別。」

薯片叔叔喜愛嘅歌手包括Janis Ian、Peter、Paul & Mary、Joan Baez，全部都見過真人，都係一個紀錄。訪問當日志淙展示咗一啲私人珍藏唱片，其實薯片叔叔當年喺美國都儲埋唔少，佢話:「有次屋企水浸，啲珍藏唱片放咗喺地牢，全部浸爛晒，真係好可惜。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent