韓國男團SuperJunior成員希澈喺噚晚主持嘅節目中提到少女時代隊長泰妍同EXO成員伯賢嘅「泰伯戀」，分析雙方粉絲反應大係因為佢哋事前喺Instagram留下拍拖嘅提示，令粉絲感覺被背叛．

希澈話：「我成日同後輩講，拍拖時千萬唔好留底痕跡，我以前拍拖時同女朋友一張合照都無，女藝人成日問我係咪唔係真心鍾意佢時，我會話，你以後就知我咁做對你係最好。因為如果拍拖唔留底痕跡，就算之後被發現，外界反應都唔會好大，所以無必要留底啲咩。」

因為希澈用咗「女藝人」呢個字，暗示前女友係圈中人。

希澈表示自己因為同泰妍同伯賢比較熟，所以一個月前已經知道「泰伯戀」一事，而佢認為由於泰妍同伯賢都係出名愛錫粉絲嘅偶像，所以粉絲感到特別遺憾。相反，如果係佢自己本人傳出緋聞，佢啲粉絲嘅反應會係：「話知你拍唔拍拖。」表現佢直率嘅一面。