股路縱橫:有危就有機尋底期間執平貨 - 郭兆誠

蘋果日報 2008/03/16 00:00


美國次按問題急劇惡化,貝爾斯登出事,令美資大行危機一觸即發,可以好肯定咁講,聯儲局會一路出招,包括向出事的金融機構提供緊急資金,以及再重手減息,以解決信貸緊縮問題,同重振投資者信心。市場已估計,聯儲局本周三有逾五成機會大幅減息一厘。
恒指有機下試20000關
美資大行股價插水式下挫,上周五道指12000大關再失守,尾段略為回穩,由大跌300多點收窄到下跌198點,報11951點,本周會繼續尋底,下試上次低位11634;港股亦然,考驗1月22日的21709支持。
港股上周升三跌二,全周共下跌264點,但尾段走勢好弱,上周五曾一度上升440多點,但臨尾散晒,結果收22237,倒跌64點收場。目前港股下望最近的兩個支持位,第一個係21709,第二個係跌穿今年三角形升軌的量度下跌目標20060。
由於外圍同內地A股跌勢未止,港股勢受拖累,21709若守唔住,好大機會下試20060。去年8月17日低點19387會係另一個支持位。
H股指數同樣跌穿三角形升軌,上周五收11891,距1月22日低位11779只有112點,今次跌穿機會頗大,會下試量度跌幅10300。
大市若破底而落,則去年10月30日(高位31958)開始的跌市未完。上一次低位21709跌幅達32%,已超過美股熊市平均跌幅的31%,若今次一如所料的跌到近20000點水平,則跌幅更超過37%,時間(估計會到4月初)亦超過5個月,更能滿足大跌市接近上限的要求。
empty
跌得越深彈幅亦越大
因此,未來大半個月,大市會反覆尋底,可能會跌多1至2千點,但跌市隨時會完成,重新開展上升浪。今次跌得越深,日後反彈的幅度越大。
年中的升浪估計會為時半年,以個別發展為主,特別係在過去半年已大跌的三四線股(個別跌幅達七至九成),可優先選取,反彈幅度會係以倍計算。
細價股心水有中策集團(235)、利來控股(221)和結好控股(064),都值得留意。