林奕匡(Phil)半年前喺加拿大同李靄璣（Rikko）註冊結婚，噚晚呢對新人喺W酒店擺酒結婚，接近散席時，一對新人接受訪問，新娘着住紅色晚裝裙好搶眼，兩個都冇醉意，Phil話：「好盡興、好開心，好期待之後嘅party time，會有台上表演，伴郎、伴娘鄧佩儀同馮允謙會合唱一首歌。」Rikko接住話：「我自己演出嗰part，都係3日前先諗，相信感覺會好sweet，我知佢(老公)會唱歌畀我surprise。」Phil聽到即刻埋關子話冇啲咁嘅事。

Phil仲話多得外母大人幫手頂酒，所以冇醉意。至於邊個接到花球？Rikko就話：「由個圈外姊妹接到，拋花球時啲姊妹好怕醜，冇人敢行出嚟，我話接到都係意頭，佢哋至肯行出嚟，第一次拋時太大力拋咗上燈，第二次又over咗，拋過晒啲姊妹，最後由一位行去執番個花球嘅姊妹得到。」

另外，王灝兒（JW）同男友Tarzan散席離開，JW停低接受訪問，男友已經急急腳自己走先，JW為男又護航話：「佢好怕醜㗎！」講到婚宴，佢話：「好戥一對新人開心，段求婚片好感人。」見到人咁sweet，會唔會想快啲結婚？佢話：「唔會，大家諗法都係隨緣，親友都冇催。」

精選娛聞，喺晒《娛果》
http://fb.com/appledailyent