當年今日
關於我們

一味窩輪:恆生睇升9782博賺3成

蘋果日報 2004/04/13 00:00


中東局勢亂,日本人被挾持做人質,上周五日股散195點,昨日彈番145點。台灣周末示威事件又有啲失控,但昨日台股升得重勁過日股。今日港股假後復市,睇嚟冇乜大礙,後市可以睇好,揸藍籌Call輪有機會搵米。
恒生(011)上月最低見97元,大概已確認見底,跟住過去8日喺99.50元至101.50元反覆,現價99.75元,處反覆區內下限範圍,距3月高位111.50元又有大把水位,估計等候向上突破,隨時會有幾蚊向上移動,睇上多過睇落,值得搵恒生Call輪短炒。
上周五講過,恒生Call輪9162,已屆末日,雖然槓桿率293倍勁到爆,但時間因素不利,冇得守,只適合爛炒者買賣。投機買賣而帶啲穩陣嘅,應揀9782,呢件喺恒生Call輪中,交投最活,9月到期,唔怕溢價咁快收縮,輪價55仙,有18.1倍槓桿率,而溢價5.8%亦唔算離譜,引伸波幅29%亦屬較低。短期睇正股炒高3元以上,揸隻輪可博賺3成,睇70仙以上。

滙控輪正選9135
恒生睇好,滙控(005)亦然。買滙控Call輪,始終最靚係上周四推介嘅9135,6月到期,輪價97仙,槓桿率有12.2倍,勝在溢價得1%,而隻輪到期之前,正股冇息派,溢價1%就係1%,唔使調整股息因素。
章盛