圈中有唔少名人明星都有同性密友，好似名填詞人黃偉文（Wyman）咁，有個相知相交超過10年嘅醫生密友吳偉民（Stephen），佢哋幾年前被《蘋果》影到孖住現身中環皇后大道中，夜蒲完去食消夜路上，兩人先後幫對方鍊膊頭，Stephen更大度當街擁抱Wyman，又sweet又溫馨。

喺2012年公開出櫃嘅歌手何韻詩，舊年年底被揭背住台灣女友鄧九雲搭上入職只有數月嘅新助手方迦南，有指方迦南落力冧掂阿詩身邊助手及哥哥，務求盡快混熟；後來更有傳媒影到阿詩同方迦南喺貝沙灣激咀，而鄧九雲則喺社交網貼黑白相，疑「宣佈」分手。

至於圈中模範夫婦之一嘅王敏德同馬詩慧，佢哋其中一位千金王曼喜（Kayla）年前公開出櫃，佢曾坦言講咗出嚟輕鬆晒，幸同佢父母都支持女兒嘅決定。而Kayla同同性密友Lia曾被《蘋果》影到喺公園談心時，摸黑咀嘴。

另外，剛剛喺今屆香港電影金像獎中，憑《一念無明》奪得最佳女配角嘅金燕玲，亦有密友蘇施黃。金燕玲今年接受電台訪問時，剖白過同阿蘇嘅12年情，兩度經歷婚姻失敗嘅佢，明言唔鍾意同性，但最後用咗6年時間去接受自己同阿蘇之間嘅關係。