港股昨日大挫800點後今早回升，散戶都密切留意市況。早上11點半觀塘耀才證券分行內人頭湧湧，不少散戶交頭接耳，好不熱鬧。

陳女士表示，昨日港股跌800點「濕濕碎」，表示自己炒了三十年股，跌2000點都見過，唔會覺得出奇。昨日跌市直頭留喺屋企訓覺，睇都唔想睇，今日先落去證券行望一望。她認為昨日大跌後啲人會驚，所以未有咁快上，等信心回復個市會好啲，現時宜睇定啲。

她表示平時主要炒藍籌，間中亦有炒窩輪。最近比較留意鋼鐵股，因電視講得多，加上朋友推介，知道基本因素一般般，但如果跌得多就買，賺返幾個價位就走。

「原本個市應該可以見25000點，但尋日跌一跌又要等多陣。」她表示，平時會留意牛熊分佈，「昨日有七成多是牛證，熊証只有兩成多，大戶邊有咁好死丫！」認為昨日跌市是大戶想藉機殺牛仔，但認為「再殺落去多啲都要有藉口先得！」

對於美國加息預期，陳女士認為：「成日都話加架啦！講咗咁耐，加咪仲好，唔洗成日講，講到你心慌慌，加咗佢算數啦！」

記者：張紫茵

掌握財經生活資訊，即Like「蘋果ATM」fb專頁啦！
http://fb.com/appledailyatm