現年44歲嘅傅明憲，今年3月突傳出同莊氏集團太子爺、細佢11年嘅莊家彬9年情玩完。有指係因為兩人拍拖多年感情已轉淡，亦有傳係因為男方已另結新歡，認識台灣一名音樂人，主動向傅明憲提出分手；也有版本指係因為莊家彬父親、莊士集團主席莊紹綏唔鍾意傅明憲，故迫兩人分手。

轉眼又過咗兩個月，今晚傅明憲悉心打扮到旺角新世紀廣場出席「關愛動物尊重生命」微電影放映，今次亦係傅明憲同莊家彬分手後，首次承認已經回復單身。

傳明憲話，當傳媒爆出其「分訊」之時，佢正是人在法國滑雪。好多朋友打俾佢，但因為電話費貴，故未有接聽。傅明憲仲話都有好多人send啲報道俾佢睇，不過當時專心滑雪，所以都冇睇到。咁係咪因為當時男朋友在身邊唔方便睇？傅明憲只表示:「滑雪要專心啲，驚會受傷。」

好喇，入正題，咁依家係拍緊拖，定單身？傅明憲想了想，然後才謂:「單身囉。」咁即係之前有關你同莊家彬分手之報道正確？傅明憲小心地謂:「我冇睇報道，唔知講乜。」

談到同莊家彬嘅關係，傅明憲話:「以前係經常聯絡嘅朋友，依家係少咗聯絡嘅朋友。」有傳係因為莊家彬父親唔接受佢，傅明憲淡然謂:「呢個要問當事人。」咁依家回復單身後，是否仍有聯絡莊家彬？傅明憲表示:「都有聯絡，只係冇以前咁密。」

分手要狠，傅明憲自言分手後對其工作無影響，佢話:「大家識我咁耐，都知我以前風浪仲大鑊，但都過得到。」可是不歡而散？「冇，次次都開心嘅。」不過，傅明憲特別補充一句，謂下次再揀男友的話:「希望佢會係支持愛護動物嘅人。」