社民連主席陶君行都算流年不利，區議會選舉前夕已經俾疑似有背景嘅人搞，令佢要自設cctv嚇走班麻煩友；但話口未完，又有人向報館「爆料」話阿陶有疑似「緋聞」，不過今次唔只涉及女人，連阿陶屋企啲貓貓狗狗都拉埋落水。有知情人士同八方講呢單嘢傳咗好耐，好多人知係「流嘢」；家又有人翻舊賬，怕且又係抹黑！

日前有人向全港報館用電郵「爆料」，話阿陶有個北方佳麗「紅顏知己」，兩人成日喺銅鑼灣耀華街一間酒吧出入，仲話阿陶之前帶咗隻寵物狗返屋企，呢隻獨仔其實係北方佳麗返內地之後留低嘅，不但阿陶太太孔令瑜將同隻狗親密合照放上facebook，向一眾好友炫耀；連社民連成員黃浩銘都曾經同隻狗合影喎。報料人同時又將單嘢拉埋去阿陶疑似收咗黎智英100萬捐款一事，最離奇係報料人又用簡體又用繁體字寫電郵，令人懷疑背後係咪阿爺嘅人搞鬼。
呢單所謂「緋聞」大半年前已經喺政圈同社民連內廣泛流傳，據知亦曾經有傳媒想搵料，但搞咗一大輪後，女主角固然搵唔到，連事件入面嘅「重要證人」寵物狗狗，都證實係一個街坊送畀阿陶嘅。但因為佢屋企養咗11年嗰隻貓貓好唔鍾意呢隻「小三」，成日同隻狗仔「開片」，最後只好將呢隻狗狗轉送畀黃浩銘收養，先會有阿銘同隻狗嘅合照。

八方問阿陶回應，佢斬釘截鐵話絕無其事，大鬧係一單無中生有、翻炒舊料嘅抹黑報道。佢質疑傳咗咁耐都冇人報，反而家先拎出嚟抹黑佢，擺明係想打擊佢嘅區選選情。孔令瑜就話成件傳聞佢老公好早之前同佢講過，亦知道係有人有心抹黑，佢百分百相信愛郎，好不滿有人用抹黑手法打擊陶君行選情。有社民連中人話阿陶接二連三俾人係咁抹黑，好明顯呢個只係開始，針對佢嘅抹黑行動恐怕陸續有來。

mailto:[email protected]