煲呔聽日宣讀任內最後一份施政報告，一早預告有意選特首嘅民協馮檢基噚日搶閘發表「假如我是特首」嘅施政報告，好認真咁着西裝打呔，仲問立法會秘書處借埋特首喺立法會用開個發言架，做戲真係做全套。
阿基份施政報告跟足煲呔嘅三大關注，仲搵埋專家同佢一齊研究。例如房屋方面建議分自由市場同規限市場，解決貧富懸殊就要先放棄大市場、小政府原則，同時又有針對人口老化嘅一連串安老政策。坦白講，特首1,200人小圈子選舉，泛民候選人冇可能跑出，阿基何以認真看待？佢話無非係想市民明白，民主派中人都有能力可以做特首，只係制度唔允許啫。