今日係連詩雅（Shiga）29歲生日，今年收到第一份嘅「生日禮物」，就係舊愛「麻將館大王」太子石恆聰（Anthony）爆戀上34歲阿Sa（蔡卓妍）嘅消息，據知阿Sa同Anthony發展迅速，阿Sa更登堂入室兼過夜(新聞連結： http://bit.ly/2sQPj8D )。噚日Shiga出席活動就大方話會祝福對方，同時又話佢同Anthony已經分開咗好耐，對方同邊個一齊都唔關佢事，仲話噚日講完就唔會再回應喇！(新聞連結： http://bit.ly/2t3g2gA )

咁Shiga今年又的確唔係只收到呢件「大禮」咁慘嘅，事關經理人公司老闆鄒世龍，同埋一班工作人員，噚晚同佢搞咗個驚喜生日會O氹佢開心，出席嘅人包括同公司嘅周柏豪、鄭融、黎紀君（Christy）同梁諾妍（Inez）等，大家仲夾份送咗一套Lego公仔俾佢，又喺每個公仔上標籤咗大家嘅名，寓意一家人喺埋一齊。

事後Shiga接受《蘋果》訪問話：「今年特別開心，因為經理人公司越來越多artist，多咗人陪我生日。我仲接二連三有驚喜，除咗有自製生日咭，就係Lego公仔，每人都有自己character，真係好窩心。可能自己係獨女，可以感覺特別大，好似永遠都有一班人喺我身邊陪住我咁，所以我今年生日過得非常非常開心。」有指舊愛已有新歡，問Shiga想唔想盡快搵到啱嘅人？佢就笑住話：「如果可以搵到啱嘅人梗係開心喇！但一切順其自然喇！」