英超韋斯咸係近期最多人談論嘅球隊，先有兩位阿根廷兵泰維斯同馬斯真蘭奴過檔，連一向好鬼低調嘅前鋒森莫亞都上咗射手榜一哥位置，不過佢啲入球有冇幸運成份就見仁見智喇。講開周日韋斯咸賽和維拉場波，前者攞番1分真係要還神，睇兩隊發揮維拉絕對可以贏埋。今季維拉脫胎換骨兼且係「盤王」，同新領隊奧尼爾功力勁有好大關係！
韋斯咸呢期紅就梗㗎喇，但當眾人焦點落喺阿根廷孖寶，領隊柏度一個屈尾拾將佢兩個擺喺後備席，用番近排「弗」到漏油嘅森莫亞打正選。賽前森莫亞同安祖莊臣及簡奴以4球排射手榜首位，不過紅運當頭嘅森莫亞，今場對維拉唔想入波都唔得，隊友遠射都要「省中」佢大髀改變方向入網，英足總仲判咗入森莫亞數。

森莫亞射手榜領前

結果森莫亞行運行到落腳趾尾，令佢得以5球暫時坐喺射手榜一哥位置，至於泰維斯雖然後備上陣，但光芒梗係俾森莫亞蓋過啦。維拉嗰邊嘅領隊奧尼爾認真抵讚，季前淨係喺些路廸買咗愛將柏杜夫，加上佢領軍嘅功力，令維拉𠵱家喺英超未輸過不特止，仲要4場亞洲盤全部贏晒。奧尼爾，你係得嘅！
「韋斯咸同維拉嘅領隊，求大俠都要喺度大讚一番，柏度收起阿根廷孖寶，用番狀態大勇嘅球員，獨排眾議抵讚；奧尼爾季前先上任，就即時搵出球隊弊病，唔叫食力叫咩呀？」