大摩狂追蔡約翰，今戰（7月1日）派馬14匹，包括不敗雄師「忠心勇士」及「常感恩」。

再加埋「好運」、「二郎」及「利害了」上仗非冠即亞，今季冠軍誰屬？的確令人引頸以待，還有巴西冠軍波健士，睇晨操已好快適應環境，可留意。

第四場四班1400米：「財寶家駒」唞12個星期復出，5月初曾經工夫放緩，在彭福公園踱步一個星期，但自從正常出圈後工夫就未停過，先五課單跳，然後拍跳，埋門再試泥閘，在整個操練程序來講完整無缺。

今戰是近三季首次落四班上陣，計級數橫掃同場對手，季初62分僅輸畀「勁無比」跑第二，之後又在63分再輸畀「勁無比」及已贏上二班的「最合拍」跑第三，該役蹄下敗將還包括「健康美麗」及「翠湖飛鷹」，全部都係三班頭馬。

最近兩仗專登跑嫌短的田草1200及泥地1200米搏減分，但連續兩場均跑第四，馬房求穩陣，存心要落班才郁手，配史卓豐手長腳長，最啱呢類需要大力砌才可發揮後勁的馬。

第十場三班1400米：框架離不開「太陽威威」、「利害了」及「美麗掌聲」，「太陽威威」從晨操角睇工夫做齊，但近兩仗持續跌磅較為擔心，勝在有2檔即守好而已。

「利害了」上仗第三次上陣已成功征服三班，但末段仍有外閃毛病，走規及集中力未夠，不能太過盡信。

講到穩定性、馬房部署仍然以「美麗掌聲」秤先，上仗反勝「馬到成功」，賽前已指落腳開始轉慢，但仍然能夠搶放，還要直路彈離對手，擺明係質素超班。

今次升班上陣，馬房唔揀贏馬路程1200米，專登增程1400米，相信蔡約翰與雷神都意識到係時候增程發展。

睇腳法，「美麗掌聲」長遠計可扳上1600甚至1800米，只孭121磅，唔擔心排11檔，因為1200米都夠快搶放，1400米必定能夠擺前走，況且今場快馬唔多，屬尾場馬膽不二之選。

-----------------------------
7月4日起 《蘋果動新聞》只限升級壹會員閱覽
繼續撐蘋果！