呢幾年古天樂每年嘅拍戲產量肯定冠絕香港影壇，以收入嚟計，今年古仔接咗大約10部電影，以1500萬片酬嚟計，今年佢單係拍戲就已經有1.5億收入，有傳片酬仲平過張家輝o添！

古仔繼《毒‧誡》後，嚟緊又有《喵星人》上映，不過講到最令人期待嘅就梗係由邱禮濤執導嘅陰陽路系列《常在你左右》，同埋年底開拍嘅《尋秦記》啦！計計埋埋古仔嚟緊有成10部戲排住隊嚟緊，果然係工作狂。講番佢嘅新片《喵星人》先，賣點係侵略地球嘅肥嘟嘟喵星人「犀犀利」同古仔一家四口所發生嘅搞笑事。劇情講述呢隻肥貓意外喺網上曝光後爆紅，並帶挈古仔一家四口拍攝以《奪寶奇貓》為題嘅衛生紙廣告。

為營造氣氛，當日喺屯門一個荒廢海水化淡廠拍攝，劇組將現場佈置到好陰森恐怖，出動咗幾十位演員扮喪屍，迫真程度連小演員恬恬都話怕怕。廣告中，一家四口同犀犀利化身冒險家，喺大廈中俾大批喪屍狂追，古仔帶住仔女逃命時，竟漏低咗老婆馬麗喺門外，搞到佢俾喪屍圍，而飾演喪屍嘅演員非常入戲，完全聽唔到導演喊cut，仲繼續不停咬馬麗，嚇到馬麗不停叫救命，最後要導演改用吹哨子喊cut，先至叫停到一班喪屍。