有傳阿爺掟咗過億維穩費出嚟反佔中，特區太上皇張曉明噚日講到香港普選涉及到國家安全呢個層次，班建制派仲唔出盡力狂派蛇齋餅糭動員市民出嚟反佔中咩。講到派錢吹雞叫人去8.17個反佔中遊行，個個建制團體都各出奇謀呀，唔怕醜嘅，就擺到明出手300蚊至400蚊，派錢畀人上街。蠱惑啲嘅，就扮晒搞啲乜鬼嘢「政黨體驗」活動，一個唔覺意，參加者分分鐘會中伏呀。
最新一宗疑似政治街頭騙案，係一個叫第七屆香港模擬立法會嘅組織，失驚無神出咗個「政黨體驗通知」畀主要係年輕學生嘅會員，話收到建制黨派邀請，參與一項「政黨體驗」活動，點知細心一睇，先知道呢個活動，原來係叫人8月17日，下晝1點半喺維園集合，去參加「8.17反佔中遊行」！唔少網民都投訴呢個活動「呃人」，但個組織就戴晒頭盔，話個活動唔係佢哋搞，「本會並不會為此活動負責」。哦！咁你哋又叫人去參加？由於群情洶湧，佢哋後來出咗個聲明話「一直秉持中立的立場，公平對待各政黨政團及社會團體的邀請」。

扮港島遊 仲要收20蚊

八方聽聞，有新界區嘅地區組織，蠱惑到話會喺8.17舉行參觀活動，先去歷史博物館，之後會去一個「港島活動」，仲要收人20蚊「活動費」呀！反而呢，香港寧波同鄉會就有着數喇，佢哋動員會員當日10點半開始喺同鄉會餐廳集合，有茶點招呼，醫咗肚先出發，起碼都叫有餐畀你「食住先」囉！

李八方
mailto:[email protected]