今年37歲官恩娜（Ella），前年10月做咗人阿媽後，絕對有仔萬事足，專心湊仔嘅佢，自從生咗Gabriel（bébé G）後，已經好耐冇喺幕前出現，Ig嘅相同片，幾乎都係bébé G嘅動態同成長片段。一直堅持以母乳餵哺嘅佢，仲試過喺網上狂呻餵母乳時，遭辱罵同投訴(新聞連結： http://bit.ly/2rhOGCo )。

有指Ella快將復出，早排歌癮起嘅佢，就喺新加坡旅行期間，即席喺街頭表演，就連衛蘭日前亦爆喺錄音室見過佢(新聞連結： http://bit.ly/2pBvemI )。做咗全職媽咪一段時間，嚟緊再次投入工作，同囝囝親子時光相對自然少咗，所以Ella近排把握時間，又帶阿仔去旅行，又陪佢去沙灘玩泥沙。

日前(10日)，《蘋果》見到戴上黑超、口罩嘅Ella，同bébé G到中環瑪莎試衫，沿路一直抱實囝囝嘅佢，直到入試身室試衫嗰陣，先肯放手囝囝俾外傭湊，快手快腳試完衫俾錢後，Ella就從外傭手中抱番囝囝，至於購物袋就交由外傭拎住。

之後，Ella就抱住囝囝過對面馬路嘅東方文華酒店門外等車。等車期間，未知bébé G係咪肚仔餓扭計扁嘴，Ella二話不說踎低o氹囝囝，又逐少逐少將三文治餵俾囝囝食。最後靚媽仲忍唔住，隔住口罩同bébé G錫錫，好sweet sweet。