賭王何鴻燊三房千金何超蓮創立慈善機構，最近同一間意大利餐廳合作，推出慈善特別版甜品拼盤，噚晚超蓮同該餐廳大廚喺尖沙嘴出席記者會，佢話日頭落區派咗一日慈善曲奇餅，夜晚再出席活動，準備咗700份曲奇餅送畀小朋友，好多謝大廚提供意見。

超蓮仲話今次合作傾咗幾個月，考慮過好多種甜品款式，自己諗起一種英式傳統甜品，大廚加咗芝士融入意大利元素。而講到佢嘅慈善機構，佢話一直有低調做好多慈善活動，會安排小朋友食豐富美食，方便小朋友、長者出入會有接送。超蓮話：「我細個已經好鍾意食同整甜品，將來目標係開甜品店，希望搵到拍檔合作。」

另外，賭王日前生日，超蓮話一家人同爸爸食飯慶祝好開心，家人夾份送咗一份保暖衣物做生日禮物。問到賭王有冇催婚？超蓮笑話爸爸好開通，唔會催婚。

精選娛聞，喺晒《娛果》
http://fb.com/appledailyent