新馬季開鑼日，雷神肯定係馬迷焦點，雖然近兩季開鑼日雷神都各贏三場，但以其非一般的叫座力，中三元對捧場馬迷可能得不償失，單計上季雷神騎足十場當中有七場被捧成大熱。結果三W賠率分別只係2.1、1.8及3.1倍，場場捧十蚊W都仲要輸錢！

反而已過氣的韋達更有博彩價值，前季開鑼成績一W兩Q，上季更三W一P。再講以韋達目前有限的叫座力，充滿博彩空間，周六韋達騎八隻，「正藍旗」近兩季開鑼日都配韋達跑五班1400米，成績係一W一Q，好明顯季初首戰攻力特強，評分亦比上季初出贏馬的38分低十分，人馬都有條件反彈。

另外有幾多在手仍是個謎的「肥仔」，雖初升三班跑，但澳洲PPG來港時評68分插三班，根本毫無蝕底！

馬房推介高伯新，近兩季開鑼例有進賬，上季更出六駒兩W一Q兩P，今次五駒中除了配寶遜的「自由哥」、「飛哥」機會較次外，其餘「善者」質新未見底，「要風得鋒」休出最強，「歡樂一生」1400米特準！