成日講新官上任三把火，特首上場後就冇晒火，勢在必行的特惠生果金最快下年推出，至於港人港地希望唔好學佢師傅個句「唔存在」。百事待興，好搞唔搞搞教育，Samantha親歷英文中學（EMI）和中文中學（CMI），明白教育政策足以判學生的英語水平死刑。今次國民教育，信落去真係會雙目失明。
既然狼英話國民教育係上屆搞落，何不推得一乾二淨將其擱置？上台一個月社會已經咁唔和諧，不妨諗吓造福700萬人的德政，例如發放免費電視台牌照，超人間超市獨大都俾人鬧爆，唔明三色台質素咁差仲可以橫行多年。
政績上可以學禮義廉──「本人成功爭取免費電視台牌照，全港師奶有劇追！」越多人追劇越少人上街，避免每月圍「門」，一舉兩得。電視迷從未消失，大家只是棄港追英美韓台劇集，紅劇紅埋星帶來的經濟效益不容忽視，創意爆棚的魔童王維基相信是最大得益者。雖則賣咗盤生意，但城市電訊（1137）整固多時噚日終於突破，大家可以細注撈。

Samantha
本欄逢周一、三、五刊出