十．一長假期又嚟啦，唔想外遊咁頻撲，留港消費都有好嘢玩。好似老翻LadyGaGa都老翻到國際知名嘅KimberleyDayle，10月1至3日同9至10日會現身奧海城大玩中西文化融和，以傳統嘅中國色彩融合GaGa出位造形示人，大唱首本曲PokerFace、BadRomance等，費用全免。
奧海城所屬嘅信和集團商場推廣總經理Irene話，除咗有GaGa表演，商場仲帶嚟國家級非物質文化遺產嘅江門新會民間工藝葵技，用咗2,000塊葵葉創作出高5米、闊8米嘅超巨型葵葉相機展館，擺放咗傳統葵蓑衣、葵笠及各種葵藝工具等，畀巿民參觀。喺場內消費滿$300，仲可以參加葵扇工作坊，自製葵扇拎返屋企用。

有領導人珍藏展出

新地旗下嘅大埔超級城、新太陽廣場同元朗廣場即日起至下月10日舉行「領導人珍藏展」巡迴展，PR姐姐Deledda話，珍藏展共展出300件中共已故領導人毛澤東、鄧小平、周恩來等歷史物件，總值過千萬人民幣，包括一幅估價逾百萬元嘅《毛主席去安源》織錦畫。10月1日至7日顧客在場內消費滿3,000蚊可參加抽獎，有機會贏取iPad，仲有酒店住宿同餐飲現金券。
電郵：mailto:[email protected]