周五恒指急跌270點，唔少散戶擔心未來港股走勢會轉弱，甚至好快會出現大調整。有網友問如果真係全球股市出現大調整，會最先由邊個地區開始觸發。這話題一出旋即引起網友紛紛議論。
根據《香港討論區》嘅意見調查，63.4%網友話會由美股帶動全球性調整；9.8%網友表示由港股率先觸發；由日本股市觸發則佔7.3%；另有12.2%網友認為短期內唔會有調整出現。從調查所見，大多數人相信美股會先作調整，然後拖累全球股市。

新興市場存在危機

網友小時前話︰「美國嘅經濟數據唔多理想，加上美股處於高位，相信會由美國帶動呢個調整。」網友The-Eds亦同意︰「實係美股啦，若美國開始減息，全球股市難免會應聲急跌。」雖然現時好難準確預測後市去向，但有網友指可以留意外滙走勢，若美元暴跌，將會影響對沖基金嘅資金流向，好可能係大戶推低大市嘅藉口。不過，網友hkangles覺得新興市場觸發全球性調整的機會更大，笑言︰「南美洲及印度屬兩大高危地區，因為新興市場嘅潛力早已吹得太誇，幻象遲早爆破，之後會拖累全球股市。如果我做大鱷，點都唔會喺日本、美國及歐洲熱烘烘嘅市場發難啦！」